Top Shows

Te Karere

Weekdays at 4pm | TV ONE

I ngana ai ki te hiki i tetahi makutu


Tokoiwa nga taangata i tuu ki mua i te aroaro o te Kooti Teitei o te Whanganui-a-Tara i te ra nei, i raro i te whakapae mo te kohurutanga tetahi wahine no Wainuiomata i tera tau. Tokoono o ratou he wahine, tokotoru he tane, aa, e ai ki nga korero, i te ngana ratou ki te hapai ake i nga tikanga Maori o mua hei patu maakutu.

Kore kore rawa nga kai ripoata i whakaaetia e te kaiwhakawa o te Kooti Teitei o te Whanganui a Tara ki roto o ta ratau hui i te ata nei, ahakoa ki te whakarongo, ki te whakaahua ranei i wa ratau whakarite mo te huarahi kei te whaaia e ratau mo te whakawa i te hunga e whakapaetia ana na ratau i kohuru a Janet Moses.

Ko te tino ngako o ta ratau hui, he whakamana i te rahui ki runga i nga ingoa o te tokoiwa, me tetahi atu e whakapaetia ana naana tetahi tamaiti 14 tau te pakeke i maukino i taua wa ano.

No te marama o Whiringa a Nuku o te tau kua mahue ake nei, i mate ai a Janet Moses ki te kaainga o ana tipuna ki Wainuiomata.

Ko te take i mate ai a ia, hei ta te Tari Pirihimana, i toromi a Janet i te mea kare i arikarika te wai i tahorotia e nga tokoiwa ki roto i tana waha hei wetewete i te maakutu.

Ko te makutu, hei ta ratau, i tau ki runga i a Janet na tana mau poka noa i tetahi taonga mai i tetahi hootera i te Wairarapa.

No te 2.15pm, i timata nga patapatai a nga roia a te Karauna ki te tekau kua hamanetia.


Advertisement



Advertisement

Advertisement